日本東北 --- 福島山形宮城三縣行の第五天及第六天

仙台 -> 藏王 -> 東京

今日我地要由仙台返東京，途中仲有一個景點，所以今朝六點半就要起身，七點食早餐，八點前要開車喇！尋晚我地就係住我地的最愛 --- 東橫 Inn 。又廉宜、又乾淨、又舒服！正！

尋日的天氣認真麻麻，感恩的響松島遊船河時無落雪。今早仍有d飄雪的，但再開車時已經好好天喇！正！

呢張相係我老婆影的，我揸緊車，見個天咁藍，真係難得！

講咁耐，都未講今個trip最後一個景點係邊？！就係山形縣的藏王喇！我地極期待去藏王睇樹冰喇！我地原本想在第三日或第四日去藏王的，因為當時仍然在山形，車程會比較近，但響出發前的幾天，從日本氣象廳的網頁中得知，行程中的第二日至第四日山形縣會落大雪，上藏王應該會乜都睇唔到，所以我地決定改變行程，去藏王改為第五日返東京前去的惟一景點。睇來今日的天氣應該會比前幾日好d！

經過接近兩個鐘的車程，終於到達藏王喇！因為今日係星期日，有好多本地人去藏王滑雪，所以都好多人排隊搭纜車。我地足足等左三班纜車先上到。

上左纜車，見到纜車下的樹掛，已被雪包圍著，令我地極期待山頂的情況。不過望上山頂，仍然見到好多厚雲，我老婆覺得天氣應該唔會太好，唯有祈禱吧！

上到山頂，其實環境真的唔太好，常有大風，到處都係煙霧，視野亦朦朧，亦好凍。daddy同mammy就留在纜車站內，我同老婆同家姐就出去睇樹冰。等左十分鐘左右，神蹟終於出現！個天突然間藍左一陣！嘩！超超超感恩！爭取時間，立即影相！d樹冰真係好壯觀呀！我同家姐立即影左好多張相啦！

影下影下又開始天陰陰，我同家姐快手d影多幾張近照先！

其實每次的藍天只係維持幾十秒左右，天又開始變朦，又要等下次天藍的時間！一等到天藍，家姐立即同我地影相；等到下一次天藍時，我地又幫返家姐影相！

但天氣開始愈來愈差，天色愈來愈灰暗了。

之後的情況就係咁樣喇！只可見到樹冰的輪廓，遠d的地方乜都見唔到！

天氣差、又凍，我地決定返纜車站喇！

感恩的係選擇響第五日才到藏王！感恩的係有幾次、每次幾十秒的藍天！

之後的情況就一直係咁樣喇！

好喇！要落山喇！落山時見到的景色，比上山時差得遠喇！

我地離開藏王前，在餐廳中食lunch。簡簡單單的一碗叉燒拉麵都好好味的！

呢個就係daddy、家姐同我極之讚賞的咖哩豬扒飯！比起香港任何一間的都好食！

走喇！離開藏王喇！我地要由藏王駕車返東京，共六小時呀！剩係響東京都塞左成個鐘頭啦！

揸左五日車，行左1330公里，終於還車了。我地搭 ANA NH 1275號班機，於2020起飛，於(22/2)第六日凌晨0040返到香港。

後記：

呢六日的行程，只可用感恩來形容，因為Daddy的身體可以應付五天的行程、各人的身體狀況還ok、天氣還不太惡劣、行程的平安、第一次在雪地駕車仍安全．．．這一切都來自上帝的保守！

今次我地最開心係去浸有特色的溫泉，所以我地計劃出年去和歌山再浸溫泉嘆下喇！