日本東北 --- 福島山形宮城三縣行の第二天

大內宿 -> 喜多方拉麵館 -> 山形縣上山市

因為坐零晨機的關係，之前大家都「無覺好訓」，所以尋晚訓得特別好！臨訓前我地叫daddy食三粒日本的感冒藥，睇下會否好d，今朝一起床我同老婆關心的唔係窗外的景色或有無落雪，而係daddy會唔會好d呢？！

過去daddy間房，知道daddy同mammy尋晚都訓得好好，daddy仲話d日本藥真係好野，食左三粒已經無乜頭痛，再食多一次三粒就已經好左好多！ 日本感冒藥，ichiban！

其實我地為左daddy同mammy可以一齊浸溫泉，我地book左尋晚的「貸切」溫泉，即係「包場」四十五分鐘，期間其他人唔可以進入的。但尋晚daddy的狀況，根本唔係好適合浸溫泉！今朝見佢精神d，我地提議daddy同我去試下浸溫泉，或者對身體的康復有幫助的。Daddy竟然一口答應，或者佢都想快d好番，唔想影響我地的行程及旅行的心情！

今早我同daddy可以去尋晚我地book左「貸切」的溫泉浸下，我地一入去溫泉，發現裡面無其他人，我地梗係立即行動啦！當然我唔會錯過大好機會 --- 影下溫泉的情景啦！好舒服！對著小溪浸溫泉，聽到流水的聲音，勁有feel！仲有，尋日無落雪，今朝一早竟然飄雪，超開心！

其實今次我同daddy兩個浸溫泉，時間雖短，但daddy就同我講左好多「男人的感慨」，我當然無同老婆講啦！我就覺得我了解daddy更多喇！

浸完溫泉，一齊去食早餐。其實我地約左八點響餐廳等，但我同daddy成八點十五分先去到，令老婆、mammy同家姐都擔心。因為daddy仲係感冒，仲有呢次係佢的「第一次」「貸切」浸溫泉，身體唔係好適應，換衫時有d頭暈暈，要坐一陣先好d，我就一路陪住daddy囉。

落到餐廳，daddy第一句同佢地講，話浸溫泉好舒服呀！跟住又話要出去攞d乜野食，又話d日本感冒藥好勁．．．我地就知道daddy今日好番好多！各人都放下心頭大石喇！

餐廳的食物質素好高，雖然我地響日本食過好多唔同類型的早餐，食物的賣相亦差不多，但新淹館d野食真係好味！

我尤其喜歡食「溫玉」 --- 溫泉蛋同埋玉子。普通的溫泉蛋，蛋黃係半固體半流質的，今次食呢隻的蛋黃係全「啫喱」狀，十分好味！

餐廳的環境亦好舒服，可以望向窗外的飄雪食早餐，一絕！

好，食飽飽，執行李出發！房外的景色，超靚！

開車前同老婆影下相先，咁靚！落緊雪，拖住老婆隻手，踏下昨晚落的新雪，一樂也！

我地好好好鍾意呢條橋同條小溪，真係好浪漫！

我地架車已經鋪滿一層雪喇！臨走前我響酒店lobby見到幾張獎狀，係由日本的訂酒店網jalan頒發的人氣最高酒店獎，原來新淹館係每季都攞全縣的三甲獎的！值得推薦！

好！出發去今日第一景點 --- 大內宿。一小時的車程，沿途已經無落雪，仲出陽光添！感恩！

在江戶時代，大內宿曾是繁華一時的驛站，往來官員商旅都經呢度休息的。明治時代，隨著高速公路開通，大內宿遠離重要的交通動脈，繁華凋零的背後，保存左大批的古傳統建築，與岐阜縣的合掌村、京都的美山町，並列為三大茅屋之里。其實我同老婆有幸去過合掌村，今次去埋大內宿喇！好野！

商店前見到隻秋田犬，超可愛，十分有性格！唔「騷」我呀！不過真係好cute的！

我地響網上睇過大內宿d相，夏天的景色無冬天咁靚，加上無落雪仲見到藍天，十分開心，最重要係daddy話今日狀態好左好多，同我地一路行一路有講有笑，令我同老婆再次經歷上帝聽禱告！感恩！

可能比較早的關係，來參觀的人唔多，大內宿好寧靜、好靚，心情特別好的！

其實大內宿的茅屋，好多已成為民宿或者商店，響裡面住的日本人已經唔多。

見到地上的「渠」，其實係因為d屋係用木同茅草興建而成，所以火災時居民就用從山上流下的溪水匯入渠內，以作救火之用。

我地行左上個小山坡，其實係一條小小的山路，上去都幾辛苦的！但辛苦都係值得，因為可以見到大內宿的全景，幾辛苦都值得！超靚！

好喇！係時候食午飯。我地去左大內宿著名的三澤屋，食日本唯一原條大蔥蕎麥麵。

坐位好有特色。位前有d灰色的沙，上面有幾舊炭，用來取暖。我地叫左燒河魚，十分好味！

著名的大蔥蕎麥麵出場。但竟然係冷食！大家都覺得個麵「名過於實」，唔係好好味咋！

好，食飽再出發！我地特登經過喜多方，食下當地著名的拉麵！喜多方拉麵同札幌拉麵、博多拉麵齊名，係日本三大拉麵之一。出發時天氣咁好，又即將有好野食，心情勁靚！

經過個半鐘頭的車程，到達了喜多方。我地先去拉麵館，睇下有乜收穫先！

嘩！有好多喜多方拉麵賣！我老婆咁鍾意食麵，即時掃左幾盒返香港慢慢歎！

掃完貨，一定要去喜多方拉麵的元祖店 --- 源來軒。

我地order左源來軒最出名的叉燒拉麵(左)和大蔥拉麵(右)，十分好食，但我地覺得始終係響橫濱拉麵博物館內龍上海的拉麵最正！(點知之後駕車，竟然見到龍上海本店，因為趕時間無去到食！)

店內有好多名人幫襯的，其實周麗淇響櫻紅醉了曾經介紹過呢間拉麵店，但我就搵極都搵唔到佢個簽名，只係搵到裕美的簽名(加下角)，佢響雪映移城中亦曾經介紹過的！

好喇！食飽又開車返酒店！經過兩個半鐘車程，到達今晚入住的酒店 --- 山形縣上山市的葉山館。放低行李，立即去餐廳食晚飯！嘩！今晚仲grand，我地響一間獨立的房間食飯，食物有「食前酒」、「前菜」、「煮物」、「溫物」、「燒物」、「揚物」、「蒸物」、「酢物」、「食事」、「止椀」、「香物」、「水菓子」，勁！

我等唔切，只係影左其中小部份就開餐喇！十分好味的！最高興係daddy有胃口食呀！