韓國首爾浪漫之旅の第五天

首爾車站 -> 南大門 -> 明洞

一早起床，第一句同老婆講的，就梗係「新年快樂」啦！2009年的第一天，韓國的天氣十分好，天晴、溫度又無尋晚咁凍！好，新一年、新開始！努力玩埋今日，之後努力返工博殺！

導遊先帶我地去新村地鐵站附近的餐廳食早餐，點解D地方咁熟識的！尋晚係響呢處搭的士番酒店的！今日的行程主要以參觀為主，包括青瓦臺總統府、人蔘專賣廳、紫水晶專門店、高麗真珠草專門店，仲有明洞！

嘩！全部都係我地唔太想去的，於是...........我地又問導遊可唔可以再有半日自由行時間！其實我地同導遊都幾熟，佢批准我地的申請，叫我地下午三點半響明洞集合！哈哈，好野！我地又有六個鐘頭自由行！影下離開餐廳後的街景先！

我地又搭地鐵出發，第一站係我要求的 --- 首爾車站！我去旅行有個習慣，如果可以的話，會響當地的首都車站影張相，證明「到此一遊」！好，出發！呢張相係韓國的地鐵，我覺得真係好似日本的鐵路車卡！

只係搭左五個站，就由新村到達首爾車站，勁快！好，我當然要影車站的指示牌啦！到此一遊呀！